मुगट जिल्हा परिषद शाळेमध्ये माजी विद्यार्थी मेळावा उत्साहात संपन्न.

 संपादक आशिष मुगटकर

नांदेड जिल्हा प्रतिनिधी 

      दि.१ फेब्रुवारी रोजी मुदखेड तालुक्यातील मुगट येथील जिल्हा परिषद शाळेत सकाळी ११वाजता माजी विद्यार्थी व माजी शिक्षक मेळाव्याचे आयोजन करण्यात आले होते. 

          या मेळाव्याच्या अध्यक्षस्थानी श्री गजानन जोशी (राष्ट्रपती पुरस्कार प्राप्त शिक्षक),प्रमुख पाहुणे म्हणून श्री देविदास पवार (माजी मनपा आयुक्त ) हे होते.

          शाळेतील सण १९६५ ते २०१५ या कालावधीतील शालेय शिक्षण घेतलेल्या माजी विद्यार्थी तसेच माजी शिक्षकांसाठी शाळेकडून आयोजित करण्यात आला होता. 

    या कार्यक्रमाचे प्रास्ताविक शाळेचे मुख्याध्यापक तुकाराम मुंगरे यांनी सुरुवातीला केले. 

    कार्यक्रमाचे अध्यक्ष व प्रमुख पाहुणे यांच्या हस्ते महामानवाच्या प्रतिमेचे पूजन व दीप प्रज्वलन करण्यात आले. 

     शाळेत तत्कालीन मुख्याध्यापक, शिक्षक म्हणून कार्य केलेल्या उपस्थित सर्वांचा शाल व पुष्प देऊन माजी विद्यार्थ्यांच्या हस्ते सत्कार करण्यात आला. 

      यावेळी जवळपास शाळेतील २५ माजी मुख्याध्यापक ,माजी शिक्षक, शिक्षीका यांनी या मेळाव्यासाठी आवर्जून उपस्थिती लावली होती. 

   माजी विद्यार्थी मेळाव्याच्या निमित्ताने मुंबई, पुणे, छ.संभाजीनगर येथून माजी विद्यार्थी व शिक्षक आले होते. या शाळेचे माजी विद्यार्थी विविध क्षेत्रात आपल्या कार्याचा ठसा उमटवत आहेत तर अनेक जण मोठ्या पदावर विराजमान होऊन सेवानिवृत्त झाले आहेत.

       या माजी विद्यार्थी मेळाव्याच्या निमित्ताने शाळेतील माजी शिक्षकांनी आपले मनोगत मांडले व शालेय जीवनातील आपल्या जुन्या आठवणींना उजाळा दिला त्यात एस. के. पचलिंग सर, बी.टी पाटील सर, नारायण कुलकर्णी सर, चंडीदास देशपांडे सर, पी एम.पेंटेवाड सर, आदींनी आपले मनोगत यावेळी  मांडले. 

      माजी विद्यार्थी यांनी सुध्दा शालेय जीवनातील आपल्या जुन्या आठवणींना याप्रसंगी उजाळा दिला. या प्रसंगी माजी विद्यार्थी यांच्याकडून शाळेला एक प्रिंटर, १५ पांढरे फळे या वस्तू भेट दिल्या.

    सर्वात शेवटी कार्यक्रमाचे अध्यक्ष व प्रमुख पाहुणे यांनी आपले मनोगत यावेळी व्यक्त केले. शाळेचे मुख्याध्यापक यांनी हा एक चांगला उपक्रम हाती घेतला आहे. दरवर्षी आपण हा उपक्रम अशाच पद्धतीने राबवावा असं मनोगत यावेळी त्यांनी व्यक्त केले.         कार्यक्रमाचे सूत्रसंचाल ज्ञानेश्वर मरकंटे (शिक्षक) आशिष कल्याणे  यांनी केले. हा कार्यक्रम यशस्वी करण्यासाठी शाळेतील शालेय समिती,शिक्षक व शिक्षकोत्तर कर्मचारी,माजी विद्यार्थी यांनी परिश्रम घेतले.

      मुगट जिल्हा परिषद शाळेत प्रथमच हा माजी विद्यार्थी मेळावा आयोजित करण्यात आला होता. त्या निमित्ताने मोठ्या प्रमाणात शाळेमध्ये माजी विद्यार्थी, माजी शिक्षक यांची मोठ्या संख्येने उपस्थिती होती. हा नवीनच उपक्रम शाळेमध्ये प्रथमच राबवला त्यामुळे शाळेतील या उपक्रमाचे सर्वत्र कौतुक होत आहे.