देवापूर येथे श्री शिवशंकर शेतकरी गटाचा वर्धापन दिन साजरा

 संपादक आशिष मुगटकर

वर्धापनदिन :- मुदखेड तालुक्यातील देवापूर येथे श्री शिवशंकर शेतकरी गटाचा प्रथम वर्धापन दिन कृषीविषयक विविध कार्यक्रम घेऊन साजरा.

मुदखेड / तालुका प्रतिनिधी

    मुदखेड तालुक्यातील देवापूर येथे श्री शिवशंकर शेतकरी गटाचा प्रथम वर्धापन दिन कृषीविषयक विविध कार्यक्रम घेऊन तसेच शासनाने कोविड-१९ साठी निर्देशित केलेल्या नियमानुसार साजरा करण्यात आला.

   गावातील जेष्ठ नागरिक चंपतराव जाधव यांच्या अध्यक्षतेखाली घेण्यात आलेल्या कार्यक्रमाचे प्रास्ताविक गटाचे सचिव केशव जाधव यांनी केले.

   यावेळी मं. कृ. अ. वाघमारे साहेब यांनी गट क्षमता बांधणी तर प्रगतिशील शेतकरी विठ्ठल लष्करे यांनी पूर्वहंगामी ऊस लागवड याविषयी मार्गदर्शन केले. त्यानंतर कृषी सहाय्यक तथा पेस्ट स्काऊट राम कपाटे यांनी कृषी तंत्रज्ञान वापरताना येणाऱ्या अडचणी, सोयाबीन बीजोत्पादन, कीटकनाशक वापरताना घ्यावयाची काळजी, कापसातील बोंडे सड तसेच केळीवरील सी एम व्ही रोगाविषयी सविस्तर मार्गदर्शन केले.

     कोरोना वर यशस्वीरीत्या मात केल्याबद्दल चंपतराव जाधव यांचा तर कृषी विषयी उत्कृष्ट कार्य केल्याबद्दल राम कपाटे यांचा गावकऱ्यां तर्फे सत्कार करण्यात आला. पर्यावरण प्रेमी कृषी मित्र विठ्ठल लष्करे यांच्याकडून सर्व शेतकऱ्यांना वृक्ष वाटप करण्यात आले. त्यानंतर कृषी वार्ता फलकाचे अनावरण करण्यात आले. 

     कार्यक्रमासाठी तलाठी होंडे ,पो. पा. साहेबराव जाधव, चेअरमन आनंदराव जाधव ,पंडितराव जाधव तसेच गावातील शेतकरी आणि गटाचे सदस्य उपस्थित होते. गटाचे अध्यक्ष कमलाकर जाधव यांच्या आभार प्रदर्शनानंतर कार्यक्रमाची सांगता करण्यात आली.